ಬೆಂಗಳೂರು: ಒತ್ತಡ, ಸ್ಪರ್ಧೆ, ಪರಿಸರ ಬಿಕ್ಕಟ್ಟು ಮತ್ತು ತಂತ್ರಜ್ಞಾನದ ತ್ವರಿತ ವೇಗವಿರುವ ಇಂದಿನ ಜಗತ್ತಿನಲ್ಲಿ, ಭಾರತೀಯ ಜ್ಞಾನ ಸಂಪ್ರದಾಯವು ನಮಗೆ ಸಂಯಮ, ಸಮತೋಲನ ಮತ್ತು ಸಹಬಾಳ್ವೆಯ ಮಾರ್ಗವನ್ನು ತೋರಿಸುತ್ತದೆ ಎಂದು ರಾಜ್ಯಪಾಲ ಥಾವರ ಚಂದ್ ಗೆಹಲೋತ್ ಹೇಳಿದರು.
ಭಾರತ ಸರ್ಕಾರದ ಶಿಕ್ಷಣ ಸಚಿವಾಲಯದ ಕೇಂದ್ರ ಹಿಂದಿ ನಿರ್ದೇಶನಾಲಯ ಮತ್ತು ಕರ್ನಾಟಕ ರಾಜ್ಯ ವಿಶ್ವವಿದ್ಯಾಲಯ ಕಾಲೇಜು ಹಿಂದಿ ಪ್ರಾಧ್ಯಾಪಕರ ಸಂಘದ ಆಶ್ರಯದಲ್ಲಿ, ಸೇಂಟ್ ಪೌಲ್ಸ್ ಕಾಲೇಜಿನ ಭಾಷೆ ವಿಭಾಗ ಆಯೋಜಿಸಿದ್ದ ಪ್ರಸ್ತುತ ದೃಷ್ಟಿಕೋನದಲ್ಲಿ ಭಾರತೀಯ ಜ್ಞಾನ ಸಂಪ್ರದಾಯದ ಮಹತ್ವ ಎಂಬ ವಿಷಯದ ಕುರಿತು ಎರಡು ದಿನಗಳ ರಾಷ್ಟ್ರೀಯ ಸಮ್ಮೇಳನವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಪ್ರಸ್ತುತ ಭಾರತವನ್ನು ಸಂಪ್ರದಾಯದ ಭೂಮಿ ಮತ್ತು ನಾವೀನ್ಯತೆ ಮತ್ತು ತಂತ್ರಜ್ಞಾನದ ಶಕ್ತಿಕೇಂದ್ರವೆಂದು ಗುರುತಿಸಲಾಗಿದೆ. ಆದ್ದರಿಂದ, ಕೃತಕ ಬುದ್ಧಿಮತ್ತೆ (ಎಐ)ಯ ಯುಗದಲ್ಲಿ ನೀತಿಶಾಸ್ತ್ರ ಮತ್ತು ಮಾನವೀಯ ಮೌಲ್ಯಗಳು, ಹವಾಮಾನ ಬದಲಾವಣೆಯ ಮಧ್ಯೆ ಪ್ರಕೃತಿಯೊಂದಿಗೆ ಸಾಮರಸ್ಯ, ಸೂಪರ್ಫಾಸ್ಟ್ ತಂತ್ರಜ್ಞಾನದ ಯುಗದಲ್ಲಿ ಮಾನಸಿಕ ಸಮತೋಲನ ಮತ್ತು ಜಾಗತೀಕರಣದ ಮಧ್ಯೆ ಸಾಂಸ್ಕೃತಿಕ ಗುರುತಿನ ರಕ್ಷಣೆ – ಸಂಪ್ರದಾಯ ಮತ್ತು ಆಧುನಿಕತೆಯ ನಡುವೆ ಸಮತೋಲನವನ್ನು ಕಾಯ್ದುಕೊಳ್ಳುವುದು ನಮಗೆ ನಿರ್ಣಾಯಕವಾಗಿದೆ. ಭಾರತೀಯ ಜ್ಞಾನ ಸಂಪ್ರದಾಯವು ಇವೆಲ್ಲಕ್ಕೂ ಬಲವಾದ ಅಡಿಪಾಯವನ್ನು ಒದಗಿಸುತ್ತದೆ ಎಂದರು.
ಆರ್ಯಭಟ, ವರಾಹಮಿಹಿರ, ಚರಕ, ಸುಶ್ರುತ, ಭಾಸ್ಕರಾಚಾರ್ಯ ಮತ್ತು ನಾಗಾರ್ಜುನರ ವೈಜ್ಞಾನಿಕ ಪ್ರತಿಗಳಲ್ಲಿ ಗಣಿತ, ರಸಾಯನಶಾಸ್ತ್ರ, ಔಷಧ ಮತ್ತು ಖಗೋಳಶಾಸ್ತ್ರಕ್ಕೆ ಅನುಪಮ ಕೊಡುಗೆಗಳನ್ನು ನೀಡಿದ್ದಾರೆ. ಶೂನ್ಯ ಸಿದ್ಧಾಂತ, ದಶಮಾಂಶ ವ್ಯವಸ್ಥೆ, ಶಸ್ತ್ರಚಿಕಿತ್ಸೆ, ಲೋಹಶಾಸ್ತ್ರ, ನೀರಿನ ನಿರ್ವಹಣೆ ಮತ್ತು ಪರಿಸರ ಸಂರಕ್ಷಣೆ ಇವೆಲ್ಲವೂ ನಮ್ಮ ಸಂಪ್ರದಾಯದ ಕೊಡುಗೆಗಳಾಗಿವೆ. ಪ್ರಾಚೀನ ಕಾಲದಲ್ಲಿ, ನಮ್ಮ ದೇಶವನ್ನು ವಿಶ್ವ ಗುರು ಎಂದು ಕರೆಯಲಾಗುತ್ತಿತ್ತು. ಇಲ್ಲಿ ನಳಂದ, ತಕ್ಷಶಿಲಾ ಮತ್ತು ವಿಕ್ರಮಶಿಲಾದಂತಹ ವಿಶ್ವ ದರ್ಜೆಯ ಶಿಕ್ಷಣ ಸಂಸ್ಥೆಗಳು ಇದ್ದವು. ವಿದೇಶಗಳಿಂದ ಸಾವಿರಾರು ವಿದ್ಯಾರ್ಥಿಗಳು ಈ ಸಂಸ್ಥೆಗಳಲ್ಲಿ ಅಧ್ಯಯನ ಮಾಡಲು ಬರುತಿದ್ದರು ಎಂದು ಹೇಳಿದರು.
ನಮ್ಮ ವೈದಿಕ ಮತ್ತು ವೇದಾಂತ ಸಂಪ್ರದಾಯಗಳು ನಮಗೆ ಸತ್ಯದ ಹುಡುಕಾಟವನ್ನು ಕಲಿಸುತ್ತವೆ. ಉಪನಿಷತ್ತುಗಳು ನಮಗೆ ಸ್ವಯಂ-ಶಕ್ತಿ ಮತ್ತು ಸ್ವಯಂ-ಜಾಗೃತಿಯ ಮಾರ್ಗವನ್ನು ತೋರಿಸುತ್ತವೆ. ಯೋಗ ಮತ್ತು ಧ್ಯಾನವನ್ನು ಇಂದು ವಿಶ್ವಾದ್ಯಂತ ಮಾನಸಿಕ ಶಾಂತಿ ಮತ್ತು ಆರೋಗ್ಯದ ಅತ್ಯುತ್ತಮ ಸಾಧ ನವೆಂದು ಗುರುತಿಸಲಾಗಿದೆ. ಆಯುರ್ವೇದವು ಸರ್ವೇ ಸಂತು ನಿರಾಮಯಾ ತತ್ವದ ವೈಜ್ಞಾನಿಕ ಸಾಕಾರವಾಗಿದೆ. ಇದು ಕೇವಲ ಚಿಕಿತ್ಸೆಯಲ್ಲ ಆದರೆ ದೇಹ, ಮನಸ್ಸು ಮತ್ತು ಆತ್ಮದ ಸಮಗ್ರ ಯೋಗಕ್ಷೇಮದ ವಿಜ್ಞಾನವಾಗಿದೆ ಎಂದು ತಿಳಿಸಿದರು.
ಕಾರ್ಯಕ್ರಮದಲ್ಲಿ ಹೊಸದಿಲ್ಲಿಯ ಕೇಂದ್ರ ಹಿಂದಿ ನಿರ್ದೇಶನಾಲಯದ ಸಹಾಯಕ ನಿರ್ದೇಶಕ ಡಾ. ಮೊಹಮ್ಮದ್ ನಸೀಮ್, ಬೆಂಗಳೂರು ವಿಶ್ವವಿದ್ಯಾಲಯದ ಕುಲಪತಿ ಡಾ. ಜಯಕರ ಶೆಟ್ಟಿ, ಸೇಂಟ್ ಪೌಲ್ಸ್ ಕಾಲೇಜಿನ ಪ್ರಾಂಶುಪಾಲ ಫಾದರ್ ಡಾ. ಥಾಮಸ್ ಎಂ.ಜೆ ಸೇರಿದಂತೆ ಇತರರಿದ್ದರು.
