ಬೆಂಗಳೂರು: ಜಯನಗರದಲ್ಲಿರುವ ಅಮೀಬಾ ಬೌಲಿಂಗ್ ಸೆಂಟರ್‌ನಲ್ಲಿ ನಡೆದ 1ನೇ ಕರ್ನಾಟಕ ರಾಜ್ಯ ರ‍್ಯಾಂಕಿಂಗ್ ಟೆನ್‌ಪಿನ್ ಬೌಲಿಂಗ್ ಟೂರ್ನಮೆಂಟ್‌ನಲ್ಲಿ ಆಕಾಶ್ ಅಶೋಕ್ ಕುಮಾರ್ ಚಾಂಪಿಯನ್ ಆಗಿ ಹೊರಹೊಮ್ಮಿದರು. ಅದ್ಭುತ ಹಾಗೂ ಪ್ರಭಾವಶಾಲಿ ಪ್ರದರ್ಶನ ನೀಡಿದ ಆಕಾಶ್ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.
ಎರಡನೇ ಶ್ರೇಯಾಂಕದ ಆಟಗಾರ ಆಕಾಶ್ ಅಶೋಕ್ ಕುಮಾರ್, ಅಗ್ರ ಶ್ರೇಯಾಂಕದ ಕಿಶನ್ ಆರ್ ವಿರುದ್ಧದ ಫೈನಲ್ ಪಂದ್ಯದಲ್ಲಿ ಪ್ರಾಬಲ್ಯ ಮೆರೆದರು. ಎರಡು ಗೇಮ್‌ಗಳ ಒಟ್ಟು ಪಿನ್‌ಫಾಲ್‌ನಲ್ಲಿ 101 ಪಿನ್‌ಗಳ ಅಂತರದಿಂದ (451–350) ಜಯ ಸಾಧಿಸಿದರು. ಟೂರ್ನಮೆಂಟ್‌ನ ಫೈನಲ್ ಪಂದ್ಯವನ್ನು ಎರಡು ಗೇಮ್‌ಗಳ ಒಟ್ಟು ಪಿನ್‌ಫಾಲ್ ಆಧಾರದ ಮೇಲೆ ನಿರ್ಧರಿಸಲಾಯಿತು. ಮೊದಲ ಗೇಮ್‌ನಲ್ಲಿ ಆಕಾಶ್ 232 ಪಿನ್‌ಗಳನ್ನು ಗಳಿಸಿದರೆ, ಕಿಶನ್ ಆರ್ 157 ಪಿನ್‌ಗಳನ್ನು ಗಳಿಸಿದರು. ಇದರಿಂದ ಆಕಾಶ್ 75 ಪಿನ್‌ಗಳ ಮುನ್ನಡೆ ಸಾಧಿಸಿದರು.
ಎರಡನೇ ಗೇಮ್‌ನಲ್ಲಿಯೂ ಆಕಾಶ್ ತಮ್ಮ ಪ್ರಭಾವಶಾಲಿ ಆಟವನ್ನು ಮುಂದುವರಿಸಿ 219 ಪಿನ್‌ಗಳನ್ನು ಗಳಿಸಿದರು. ಕಿಶನ್ ಆರ್ 193 ಪಿನ್‌ಗಳೊಂದಿಗೆ ಗೇಮ್ ಮುಗಿಸಿದರು. ಎರಡೂ ಗೇಮ್‌ಗಳಲ್ಲಿ ಆಕಾಶ್ ತೋರಿದ ಸ್ಥಿರ ಪ್ರದರ್ಶನವು ಅವರಿಗೆ 101 ಪಿನ್‌ಗಳ ಭರ್ಜರಿ ಜಯವನ್ನು ತಂದುಕೊಟ್ಟು, ಚಾಂಪಿಯನ್ ಪಟ್ಟಕ್ಕೇರಿಸಿತು. ನಾಕೌಟ್ ಸುತ್ತಿನ ಫಲಿತಾಂಶಗಳು ಫೈನಲ್‌ಗೆ ಅರ್ಹತೆ ಪಡೆದ ಆಟಗಾರರನ್ನು ನಿರ್ಧರಿಸಲು ನಾಕೌಟ್ ಹಂತದಲ್ಲಿ ಒಟ್ಟು ಎರಡು ಪಂದ್ಯಗಳು ನಡೆದವು. ನಾಕೌಟ್ ಸುತ್ತಿನಲ್ಲಿ ತೋರಿದ ಅದ್ಭುತ ಪ್ರದರ್ಶನವನ್ನು ಫೈನಲ್‌ನಲ್ಲಿಯೂ ಮುಂದುವರಿಸಿದ ಆಕಾಶ್ ಅಶೋಕ್ ಕುಮಾರ್, ಟೂರ್ನಮೆಂಟ್ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.
• ಪಂದ್ಯ 1: ಅಗ್ರ ಶ್ರೇಯಾಂಕದ ಕಿಶನ್ ಆರ್, ನಾಲ್ಕನೇ ಶ್ರೇಯಾಂಕದ ವಿಜಯ್ ಪಂಜಾಬಿ ವಿರುದ್ಧ 40 ಪಿನ್‌ಗಳ ಅಂತರದಿಂದ ಜಯ ಸಾಧಿಸಿದರು. ಅಂತಿಮ ಸ್ಕೋರ್: 358–318.
• ಪಂದ್ಯ 2: ಎರಡನೇ ಶ್ರೇಯಾಂಕದ ಆಕಾಶ್ ಅಶೋಕ್ ಕುಮಾರ್, ಮೂರನೇ ಶ್ರೇಯಾಂಕದ ಸಾಹಿಲ್ ಪಂಜಾಬಿ ವಿರುದ್ಧ 105 ಪಿನ್‌ಗಳ ಮುನ್ನಡೆಯೊಂದಿಗೆ ಜಯ ಸಾಧಿಸಿದರು. ಅಂತಿಮ ಸ್ಕೋರ್: 447–342.
ಅಂತಿಮ ಶ್ರೇಯಾಂಕಗಳು:
ಆಕಾಶ್ ಅಶೋಕ್ ಕುಮಾರ್– ವಿಜೇತರು, ಕಿಶನ್ ಆರ್– ದ್ವಿತೀಯ ಸ್ಥಾನ, ಸಾಹಿಲ್ ಪಂಜಾಬಿ– ತೃತೀಯ ಸ್ಥಾನ, ವಿಜಯ್ ಪಂಜಾಬಿ– ನಾಲ್ಕನೇ ಸ್ಥಾನ
